Liverpooli ka marrë një goditje të madhe para ndeshjes së rëndësishme në “Old Trafford” ndaj Manchester Unitedit, pasi Alexander Isaku është përjashtuar nga kjo përballje për shkak të një dëmtimi në ijë.
Sulmuesi 26-vjeçar, i transferuar për një shumë rekord nga Newcastle Unitedi, pësoi dëmtimin gjatë stërvitjes këtë javë dhe pritet t’i nënshtrohet ekzaminimeve për të përcaktuar shkallën e dëmtimit.
Sezoni i tij debutues ka qenë i vështirë, me vetëm 13 paraqitje si titullar dhe tre gola në Premierligë, i ndërprerë shpesh nga lëndimet, përfshirë edhe një thyerje këmbe më herët.
Problemet për trajnerin Arne Slot nuk mbarojnë këtu.
Hugo Ekitiké është jashtë për pjesën e mbetur të sezonit pas një dëmtimi serioz në tendinën e Akilit gjatë eliminimit nga Paris Saint-Germain në Ligën e Kampionëve.
Gjithashtu mungon edhe Mohamed Salahu, i cili po rikuperohet nga një dëmtim muskulor.
Mungesa e tij lë një boshllëk të madh në sulmin e Liverpoolit në një moment kur skuadra po lufton për të siguruar vendin e tretë në kampionat.
Në mes të këtij kaosi me lëndime, Salahu ka folur edhe për vendimin e tij për t’u larguar nga Liverpooli në fund të sezonit.
33-vjeçari konfirmoi se një bisedë private me legjendën e klubit Steven Gerrard e ndihmoi të marrë vendimin final.
Duke folur për “TNT Sports”, Salahu tha: “Jam i lumtur tani. Mbaj mend atë bisedë që patëm. E vlerësova shumë. Njerëzit nuk e dinë që erdhe në shtëpinë time. Ishte një bisedë shumë e mirë dhe e vlerësoj mendimin tënd. Jam i lumtur që po largohem me dinjitet – kjo është diçka që ma the edhe ti. Është koha të largohem. Dua të kem sukses dhe të mbahem mend në këtë klub. Ende nuk kam vendosur për të ardhmen, kam shumë opsione të mira. Por ndjej që ky është momenti i duhur dhe jam i qetë me këtë vendim”./GazetaExpress/
The post Alexander Isak mbetet jashtë ndeshjes ndaj Unitedit appeared first on Gazeta Express.