Dosje të sapopublikuara të FBI-së kanë rikthyer vëmendjen te raportimet e viteve ’60 për objekte të paidentifikuara fluturuese dhe dëshmi të pazakonta për qenie të vogla që thuhej se dilnin prej tyre.
Dokumentet u bënë publike të premten si pjesë e nismës së administratës Trump për deklasifikimin e materialeve mbi UFO-t.
Sipas dokumenteve, hetuesit shqyrtuan raportime që e përshkruanin vitin 1965 si periudhën me numrin më të madh të vëzhgimeve të UFO-ve, të raportuara nga dëshmitarë të ndryshëm në disa vende të botës.
Në përmbledhjet e FBI-së përmenden mjete metalike që thuhej se qëndronin pezull në heshtje, lëviznin me “shpejtësi të jashtëzakonshme” dhe ndërhynin në pajisje elektromagnetike. Dosjet i referohen gjithashtu pretendimeve se në disa raste ishin gjetur mbetje nga objekte të rrëzuara, përfshirë materiale të përshkruara si metale të panjohura me sfera mikroskopike në përbërje.
Një nga pjesët më të komentuara të dokumenteve lidhet me dëshmitë për “ekuipazhe” që pretendohej se kishin dalë nga këto objekte. Në raport thuhet se disa dëshmitarë kishin parë qenie rreth 1 deri në 1.2 metra të gjata, të veshura me kostume dhe helmeta që ngjanin me pajisje hapësinore.
Dokumenti i publikuar është një memo e brendshme e FBI-së, e datës 19 tetor 1966, dërguar nga zyra e San Franciscos drejt drejtorit të atëhershëm të FBI-së, J. Edgar Hoover, me subjekt “Unidentified Flying Objects”. Ai përmend buletine të mëparshme të FBI-së mbi “disqet fluturuese” dhe një artikull të publikuar në “San Francisco Examiner & Chronicle”.
Memoja trajton rritjen e debatit publik në SHBA për raportimet e UFO-ve dhe përmend edhe Gerald Ford-in, në atë kohë kongresmen, i cili kërkonte dëgjesa në Kongres për këto incidente. Dokumenti vë në dukje gjithashtu se Forcat Ajrore kishin ngarkuar fizikanin Edward U. Condon nga Universiteti i Kolorados për një studim të madh qeveritar mbi disqet fluturuese.
Një pjesë e rëndësishme e dokumentit i kushtohet librit “Flying Saucers – Serious Business” të Frank Edwards, të cilin FBI e përshkruan si një nga faktorët që kishte shtuar interesin dhe debatet publike për UFO-t. Sipas përmbledhjes së FBI-së, Edwards pretendonte se UFO-t ishin mjete hapësinore të dërguara për të vëzhguar aktivitetet në Tokë dhe se Forcat Ajrore kishin mbajtur informacione të fshehta nga frika e panikut publik.
Në raport përshkruhen objekte me forma të ndryshme: të ngjashme me zeppelinë, disqe me diametër nga disa metra deri në rreth 30 metra, si dhe objekte në formë veze. Ato thuhej se lëshonin dritë dhe nxehtësi, qëndronin pezull, lëviznin pa zhurmë dhe në disa raste linin shenja djegieje në tokë pas ngritjes.
FBI vë në dukje se shumë prej dëshmitarëve të përmendur në libër ishin persona që konsideroheshin të besueshëm, përfshirë oficerë policie, personel ushtarak, pilotë ushtarakë dhe civilë, pilotë linjash ajrore dhe zyrtarë të mbrojtjes civile. Disa raportime thuhet se vinin nga zona kërkimore atomike dhe raketore.
Megjithatë, autoritetet kanë paralajmëruar se këto dokumente përmbajnë kryesisht pretendime, dëshmi dhe përmbledhje historike, jo prova të verifikuara në mënyrë të pavarur. Zyrtarët theksojnë se dëshmitë okulare dhe raportet e vjetra nuk duhet të interpretohen si konfirmim i jetës jashtëtokësore apo i teknologjisë së avancuar jo-njerëzore.
Publikimi i së premtes përfshin qindra dokumente, fotografi dhe video të tjera, përfshirë transkripte të misioneve të NASA-s, raporte ushtarake incidentesh dhe imazhe infra të kuqe nga takime ajrore. Ligjvënësit kanë bërë të ditur se ky është vetëm grupi i parë i materialeve dhe se publikime të tjera pritet të vijojnë. /GazetaExpress/
The post Dosjet e FBI-së zbulojnë dëshmi për UFO-t appeared first on Gazeta Express.