Trajneri i Aston Villas, Unai Emery, ka vlerësuar trajnerin e Manchester Cityt, Pep Guardiola, si “më i madhi” në botën e futbollit.
Spanjolli gjithashtu ka lavdëruar punën e Mikel Artetës së Arsenalit dhe Luis Enriques të Paris Saint-Germain, teksa ka reflektuar mbi nivelin elitar të menaxhimit në ligat kryesore të Evropës.
Pavarësisht reputacionit të tij në rritje si një nga takticienët më të përpiktë në futbollin botëror, Emery mbetet një nxënës i përulur i lojës.
Pasi e ka udhëhequr Aston Villan drejt zonës së Ligës së Kampionëve – të siguruar në mënyrë dramatike me fitoren 4-2 ndaj Liverpoolit – dhe në një finale evropiane, ish-trajneri i Arsenalit mori kohë të reflektojë mbi kolegët që vazhdojnë të vendosin standardet më të larta në pankinë.
Duke folur për trajnerët elitarë të momentit, Emery veçoi trajnerin e Manchester Cityt për lavdërimin më të madh të mundshëm.
“Pep është tashmë një legjendë dhe, sipas mendimit tim, gjeniu më i madh në botën e trajningut, duke marrë parasysh gjithçka që ka treguar gjatë karrierës së tij dhe që vazhdon të tregojë,” tha Emery për “Marca”.
“Niveli është jashtëzakonisht i lartë. Niveli i Luis Enrique është i pabesueshëm, veçanërisht duke pasur parasysh vështirësinë e drejtimit të Paris Saint-Germain; ai po bën një punë të jashtëzakonshme”, tha ai.
Rivaliteti në krye të Premierligës ka detyruar çdo trajner të përshtatet ose të mbetet prapa.
Për Emeryn, i cili mori drejtimin e Aston Villas në vitin 2022, shikimi i evolucionit taktik të Artetës tek ish-klubi i tij Arsenali i ka dhënë shumë njohuri.
Ai vuri në dukje ngritjen e shpejtë të trajnerit të “Gunners” si një pjesë kyçe e peizazhit modern të trajningut, me ekipin e Artetës që aktualisht kryeson Premierligën me vetëm dy ndeshje nga fundi, duke iu afruar titullit të parë që nga viti 2004.
Emery pranoi se ai vazhdimisht mëson nga rivalët e tij për të përmirësuar metodat e veta te “Villa Park”.
“Pastaj është edhe ngritja e Artetës në vitet e fundit, si në aspektin e konkurrueshmërisë ashtu edhe të njohurive të tij. Unë mësoj shumë nga të tre ata. Iraola gjithashtu po bën sezone të jashtëzakonshme. Dhe duhet përmendur edhe Iñigo Pérez, i cili do të luajë në finalen e Ligës së Konferencës me Rayon. Është diçka e jashtëzakonshme. Përvoja dhe mentaliteti i tij konkurrues janë të dukshme,” shtoi ai.
Emri i Emerys është bërë sinonim i suksesit në Evropë, veçanërisht në Ligën e Evropës ku ai ka fituar trofeun katër herë.
Teksa përgatitë Aston Villan për një tjetër finale evropiane kundër Freiburgut, ai reflektoi mbi mënyrën se si eksperiencat e tij me Valencian, Sevillën, Arsenalin dhe Villarrealin kanë formësuar identitetin e tij si trajner.
“Evropa ka shumë rëndësi për mua. Së pari, nga mirënjohja ndaj futbollit evropian dhe, mbi të gjitha, ndaj klubeve ku kam pasur mundësinë të garoj,” shpjegoi Emery.
“Me Valencian fillova në UEFA Cup, ku arritëm dy çerekfinale dhe një gjysmëfinale. Te Sevilla kuptova çfarë përfaqëson Liga e Evropës për klubin dhe tifozët. Ata ma transmetuan atë frymë konkurruese, dhe ne e fituam tre herë”, e mbylli ai./GazetaExpress/
The post Emery thotë se Guardiola është një gjeni, ka fjalë të mira edhe për Artetën appeared first on Gazeta Express.