Cicinho ka luajtur në “Qytetin e Përjetshëm” (Romë), për Real Madridin dhe ka regjistruar 15 paraqitje me kombëtaren braziliane. Në një intervistë të fundit, 45-vjeçari ka folur hapur për varësinë e tij të rëndë nga alkooli.
Që në moshën 13-vjeçare, Cicinho u njoh me alkoolin në një festë dhe shumë shpejt u bë i varur; kjo varësi e shoqëroi për vite me radhë, duke rivalizuar edhe futbollin në jetën e tij.
“E shkatërrova veten me alkool,” tha ish-mbrojtësi për gazetën italiane “Gazzetta dello Sport”.
“Provova birrën dhe u dashurova me të si të ishte një grua. Sa më shumë rritesha, aq më shumë pija”, shtoi ai.
Sipas vetë ish-lojtarit, ai arrinte të kombinonte jetën e futbollistit profesionist me konsum të madh alkooli dhe net të gjata feste, veçanërisht gjatë periudhave te Roma dhe Real Madridi.
“Në Romë vendosa një rekord personal brenda një dite: 70 birra, 15 caipirinha dhe dy pako cigare,” kujton ish-mbrojtësi i djathtë.
Edhe para këtij “rekordi”, përdorimi i substancave i kishte dalë jashtë kontrollit.
Zbulimi i tij te Botafogo shënoi fillimin e këtij stili jete me teprime: festa, alkool dhe cigare. “Doja të arrija në majë, të fitoja pasuri dhe të argëtohesha. Kur erdha te São Paulo dhe më pas u bëra lojtar i kombëtares, mendova se kisha arritur gjithçka.”
Ai thotë se e fshihte këtë mënyrë jetese edhe nga trajneri i Real Madridit, Fabio Capello, pasi performanca e tij në fushë mbetej e mirë.
“Gjithmonë isha në shtëpi. Shkoja në shtrat në katër të mëngjesit dhe shkoja në stërvitje në tetë, ende i dehur,” tregoi Cicinho. “Para se të nisesha pija tre-katër filxhanë kafe dhe pako cigare për të fshehur erën e alkoolit. Dhe në fushë, luaja mirë.”
Problemet me gjurin dhe efektet afatgjata ndikuan gjithashtu në shëndetin e tij mendor, duke e thelluar depresionin. Në vitin 2012 u kthye në Brazil, ku nisi terapinë me mbështetje të familjes dhe miqve.
Sot jeton në São Paulo, është i martuar dhe ka një djalë pesëvjeçar. Ai punon si komentator sportiv dhe prej 10 muajsh është edhe pastor ungjillor. Prej 14 vitesh është i kthjellët (pa alkool)./GazetaExpress/
The post Ish-ylli i Realit dhe Romës çuditë me deklaratën e tij: Pija 70 birra në ditë appeared first on Gazeta Express.