Personi që shihni në këtë fotografi është shtetasi kinez Li Jianhong, një prej figurave më të njohura të biznesit në Kinë, i cili humbi jetën tragjikisht pak ditë më parë në Xibrakë. Mediat në Kinë kanë zbuluar detaje mbi figurën e biznesmenit Li Jianhong i cili njihej si një sipërmarrës i suksesshëm në rajonin e Xinjiangut.
I lindur në dhjetor të 1965, Li Jianhong ishte president i Xinjiang Grand Scape Group si dhe themelues i resortit të njohur të skive “Silkroad Mountain Resort” në Urumqi, një nga projektet më të rëndësishme të turizmit dimëror në Kinë.
Mediat në Kinë shkruajnë se ai e nisi karrierën në sektorin e telekomunikacionit, përpara se në vitin 1993 të linte punën në një institut në Guangzhou dhe të kthehej në Xinjiang për të ndërtuar aktivitetin e tij privat.
“Xinjiang Grand Scape Group”, që ai drejtonte, u zhvillua në një kompani të madhe me aktivitet në telekomunikacion, turizëm dhe menaxhim investimesh, duke arritur asete rreth 1.4 miliardë juanë dhe mijëra të punësuar. Në vitet e fundit, grupi ka regjistruar qarkullim të lartë dhe është renditur ndër kompanitë më të rëndësishme private në rajon.
Në vitin 2002, kompania ishte ndër themelueset e “Xinjiang International Grand Bazaar”, një nga simbolet më të njohura të qytetit të Urumqit, ndërsa më pas u tërhoq nga projekti në vitin 2017
Përveç aktivitetit të tij në biznes, Li Jianhong njihej edhe si sportist i apasionuar pas alpinizmit dhe skive. Ai ka përfunduar “Explorer’s Grand Slam”, duke ngjitur shtatë majat më të larta të botës dhe duke arritur në të dy polet.
Në vitin 2018, në moshën 53-vjeçare, ai arriti majën e Everestit, si dhe ngjitjen e Lhotse-s, duke u renditur mes alpinistëve me arritje të veçanta në nivel ndërkombëtar.
Ditën e aksidentit tragjik ai udhëtonte me disa shtetas të tjerë kinez për një vizitë pune që lidhej me biznesin në vendin tonë.