Mohamed Salahu nuk duhet të jetë “as afër ‘Anfieldit’” gjatë ndeshjes së fundit të sezonit të Liverpoolit, sipas Wayne Rooneyt, i cili beson se lojtari duhet të lihet jashtë planeve të Arne Slotit të dielën.
Javën e kaluar, pas humbjes 4-2 të Liverpoolit ndaj Aston Villas, një Salah dukshëm i frustruar publikoi një postim shpërthyes në rrjetet sociale që vazhdon të bëjë bujë.
Në një deklaratë me tone të forta, 33-vjeçari dukej se kritikonte stilin e lojës së Arne Slotit, ndërsa kërkonte që Liverpooli të rikthehej te “futbolli heavy metal sulmues që kundërshtarët e frikësohen”.
Ai shtoi: “Ky është futbolli që di të luaj dhe ky është identiteti që duhet të rikthehet dhe të ruhet përgjithmonë. Nuk duhet të jetë i negociueshëm dhe çdo lojtar që bashkohet me këtë klub duhet t’i përshtatet”.
Salahu, i cili ka shënuar 19 gola në të gjitha garat këtë sezon, premtoi gjithashtu se do të luftojë për ta siguruar Ligën e Kampionëve në ndeshjen e tij të fundit me klubin.
Por pyetja mbetet – a do të përfshihet egjiptiani në ndeshjen e së dielës kundër Brentfordit?
Wayne Rooney beson se Salahu duhet të lihet jashtë skuadrës së Arne Slot për lamtumirën në “Anfield” pas shpërthimit të tij publik.
“Më duket e trishtë në fund, pas gjithçkaje që ka bërë dhe arritur te Liverpooli. Nuk ishte momenti që ai të dilte publikisht dhe të godiste sërish Slotin,” tha Rooney në emisionin “Wayne Rooney Show”.
“Ai dëshiron futboll heavy metal, kështu që praktikisht po thotë se dëshiron futbollin e Jurgen Kloppit. Unë nuk mendoj se Mo Salahu mund ta përballojë më atë lloj futbolli. Besoj se këmbët e tij nuk janë më për atë ritëm dhe intensitet të lartë”, shtoi anglezi.
“Nëse do të isha Arne Sloti, nuk do ta lejoja as t’i afrohej stadiumit në ndeshjen e fundit,” vazhdoi Rooney.
“Mua më ka ndodhur me Alex Fergusonin. Patëm një mosmarrëveshje dhe konflikt, dhe në ndeshjen e fundit të Fergusonit në ‘Old Trafford’ ai më la jashtë skuadrës për atë arsye”, tha Rooney.
“Ai praktikisht hodhi granatën dhe tha se nuk i beson Arne Slotit, ndërsa gjithashtu i vendosi në pozitë të vështirë shokët e skuadrës që do të jenë aty sezonin e ardhshëm”, u shpreh anglezi.
Duke folur për sjelljen e Salahut këtë sezon, Rooney tha se sulmuesi ka qenë “egoist”.
“Mendoj se Salahu po përpiqet të justifikojë veten dhe të ndihet më mirë sepse ka pasur një sezon shumë të dobët,” shtoi ai.
“Mendoj se ka qenë shumë egoist në atë që ka bërë në të dy rastet. Është për të ardhur keq dhe tifozët do të jenë në anën e tij, por kur e shikon më thellë dhe ke qenë në një dhomë zhveshjeje në situata të ngjashme, Mo Salahu e di saktësisht çfarë po bën”, shtoi ai.
“Ai është trajneri yt. Nuk mund ta mosrespektosh publikisht dy herë dhe të kalosh pa pasoja”.
“Po të isha Arne Sloti, do të duhej të tregoja autoritet dhe t’i thosha: ‘Nuk do t’i afrohesh fare stadiumit të shtunën, të pëlqejë apo jo.’ Dyshoj shumë se do ta bëjë këtë, por mendoj se duhet.”
“Sigurisht që meriton një lamtumirë të mirë, por a e meriton pas kësaj? Është hera e dytë që e bën. Është thjesht për të ardhur keq të shohësh një nga ikonat më të mëdha të Premier League të largohet ndoshta në këtë mënyrë.”
Në deklaratën e tij, Salahu kishte shkruar:
“Kam parë këtë klub të kalojë nga dyshues në besimtarë dhe nga besimtarë në kampionë. U desh shumë punë dhe unë gjithmonë bëra gjithçka që munda për ta ndihmuar klubin të arrinte aty. Asgjë nuk më bën më krenar se kaq.”
“Shkatërrimi ynë në një tjetër humbje këtë sezon ishte shumë i dhimbshëm dhe jo ajo që meritojnë tifozët tanë. Dua ta shoh Liverpoolin të rikthehet te futbolli heavy metal sulmues dhe te fitimi i trofeve.”
“Ky është futbolli që di të luaj dhe ky është identiteti që duhet të rikthehet dhe të ruhet përgjithmonë. Nuk duhet të jetë i negociueshëm dhe çdo lojtar që bashkohet me këtë klub duhet t’i përshtatet. Fitimi i disa ndeshjeve këtu e aty nuk është ajo që duhet të përfaqësojë Liverpoolin.”
“Liverpooli do të jetë gjithmonë një klub që do të ketë shumë rëndësi për mua dhe familjen time. Dua ta shoh të suksesshëm edhe shumë kohë pasi të jem larguar.”
“Siç kam thënë gjithmonë, kualifikimi në Ligën e Kampionëve sezonin e ardhshëm është minimumi dhe do të bëj gjithçka që mundem që ta arrijmë këtë,” përfundoi Salahu.
Liverpooli aktualisht ndodhet në vendin e pestë të tabelës së Premierligës para ndeshjes së fundit të sezonit kundër Brentfordit./GazetaExpress/
The post Rooney i thotë Slotit që mos ta ftojë fare Salahun, për ndeshjen e tij të fundit në “Anfield” appeared first on Gazeta Express.