Bien rastet me talasemi në Shqipëri. Në ditën botërore të ndërgjegjësimit specialistët e Institutit të Shëndetit Publik thonë se në tre vitet e fundit nuk ka asnjë foshjne të lindur me këtë sëmundje të trashëguar të gjakut.
“Ajo që vërehet është se tre vitet e fundit, sidomos tre vitet e fundit nuk ka patur raste të reja apo lindje me problematikën e talasemisë në Shqipëri. Luan rol ndërgjegjësimi dhe masat paraprake që marrin prindërit, familje që kanë evidentuar anëtar me talasemi.”
Në vendin tonë referuar regjistrit kombëtar të pacientëve janë rreth 300 persona me talasemi përgjithësisht nga Ultësira Perëndimore. Mosha dominuese është ajo mbi 18 vjeç. Jo të gjithë marrin mjekim në Qendrën Spitalore “Nënë Tereza” në Tiranë. Një pjesë trajtohen në shtetet ku kanë shkuar për të jetuar.
“Trajtimi I tyre është në varësi të formës, ose me transfuzione gjaku ose me mjekim tjetër zëvëndësues që është I rimbursueshëm në Shqipëri. nuk është vërejtur mungesë gjaku. Ajo që mund të themi ne sot është të inkurajojmë qytetarët të japin gjak, të shtohet vullnetarizmi…”
Një person me talasemi mund të përjetojë marramendje, lodhje dhe dobësi, vështirësi në frymëmarrje dhe sipas gjendjes së tyre kanë nevojë për transfusion gjaku.
“Duke u trajtuar rregullisht, është rritur cilësia e jetë së tyre, jetëgjatësia e tyre është më e madhe sa ka qenë.”
Personat me talasemi përgjithësisht diagnostikohen qe në fëmijëri pasi ata shfaqin shenjat e anemisë që herët. Por ka dhe prej atyre që mund ta bartin, mund të mos kenë simptoma por mund t’ia kalojnë këtë tipar fëmijëve duke rritur rrezikun për të pasur talasemi. Prandaj mjekët apelojnë për testime para se të bëheni prindër për të pradaluar lindjen e fëmijëve të sëmurë. Sipas Organizatës Botërore të Shëndetësisë rreth 5% e popullsisë në botë është bartëse potenciale e gjenit pathogen të hemoglobinës.