Tre kuaj janë parë duke galopuar në drejtim të kundërt në mes të autostradës A84 në Ille-et-Vilaine, në Francë, duke shkaktuar panik tek drejtuesit e automjeteve.
Sipas mediave të huaja, përcjell Telegrafi, ngjarja ka ndodhur të enjten, më 30 prill, kur kafshët u arratisën nga pronarët e tyre në zonën e Bretagne.
Kuajt kishin përshkuar rreth 14 kilometra përmes fushave përpara se të dilnin në autostradë pranë Liffré.
Ata qëndruan për më shumë se një kilometër në rrugë, ndërsa xhandarmëria ndërhyri për t’i ndaluar.
Një kamion u vendos në mënyrë strategjike për të ngadalësuar lëvizjen e tyre dhe për të shmangur një aksident.
Fatmirësisht, nuk pati të lënduar, por situata shkaktoi trafik të rënduar dhe frikë te shoferët. /Telegrafi/