Lojtarët e Iranit ende po presin që t’u lëshohen vizat për Kupën e Botës, ka thënë presidenti i Federatës Iraniane të Futbollit (FFIRI), Mehdi Taj.
Mijëra tifozë morën pjesë në një ceremoni lamtumire për skuadrën në Teheran të mërkurën, para se turneu – i organizuar bashkë nga SHBA, Kanadaja dhe Meksika – të nisë më 11 qershor.
SHBA ndodhet në konflikt me Iranin, ndonëse aktualisht mes dy vendeve është në fuqi një armëpushim njëmujor.
Taj tha se “çështja e vizave ende nuk është zgjidhur”.
“NESËR ose pasnesër do të kemi një takim vendimtar me FIFA-n. Ata duhet të na japin garanci,” tha ai për agjencinë shtetërore IRNA.
“Nuk kemi marrë asnjë informacion nga pala tjetër se kush ka marrë viza. Deri tani nuk janë lëshuar asnjë vizë.”
Irani është planifikuar të luajë kundër Zelandës së Re më 15 qershor dhe Belgjikës më 21 qershor – të dyja ndeshjet në Los Angeles – si dhe ndaj Egjiptit më 26 qershor në Seattle. Ekipi do të qëndrojë i bazuar në Tucson, Arizona.
Lufta ka krijuar pasiguri rreth pjesëmarrjes së Iranit në Kupën e Botës, por presidenti i FIFA-s, Gianni Infantino, tha në kongresin vjetor të FIFA-s në Vancouver muajin e kaluar: “Sigurisht, Irani do të luajë në Shtetet e Bashkuara të Amerikës.”
Irani ishte i vetmi vend që nuk u përfaqësua në kongres, pasi delegacioni i zyrtarëve të federatës iraniane (FFIRI), përfshirë edhe Taj, u ndaluan në kufirin kanadez.
Taj tha se vendimi për t’u kthyer në shtëpi ishte zgjedhja e tyre, pas trajtimit që ata e konsideruan si të pasjellshëm nga zyrtarët e imigracionit.
The post Irani ende po i pret vizat për Kupën e Botës appeared first on Gazeta Express.