Prokurorët francezë thonë se një djalë 15-vjeçar është vrarë dhe 2 të mitur të tjerë janë plagosur rëndë në një të shtënë të dyshuar për drogë, në qytetin perëndimor të Nantes.
Sulmuesit mbanin veshur balaklava (kapuçë) dhe përdorën armë automatike, sipas Ministrit të Brendshëm të vendit Laurent Nuñez. 13-vjeçari dhe një djalë i tretë që u plagos gjithashtu janë tani jashtë rrezikut, shtoi Nuñez.
Por Nuñez sugjeroi që viktimat mund të kenë qenë kalimtarë të pafajshëm të zënë në mes të zjarrit, informon BBC.
“Motivet pas kësaj të shtëne, siç ka deklaruar prokurori publik, ka shumë të ngjarë të lidhen me trafikun e drogës”, tha ai.
“Megjithatë… kjo nuk do të thotë që individët që u shënjestruan, dhe aq më tepër personi që vdiq, ishin vetë të përfshirë në trafikim. Dua të jem absolutisht i qartë për këtë.”
Halla e djalit 15-vjeçar, e quajtur Paola, nga lagjja e klasës punëtore e Nantes, Port-Boyer, e hodhi poshtë me forcë mundësinë që ai të ishte i përfshirë me drogë. Ajo u tha gazetarëve se nipi i saj “nuk ishte kriminel”.
Kryetarja e bashkisë, Johanna Rolland, ka dënuar atë që ajo e quan “trafikim droge që po e pllakos vendin” dhe theksoi shqetësimin dhe emocionin intensiv që ky komunitet po përjetonte pas një tjetër të shtëne me armë zjarri në fund të muajit të kaluar.
Rolland bëri thirrje që këtë herë të përdoren të gjitha burimet e policisë për të gjetur sulmuesit.
Në vitin 2025, disa qytete franceze vendosën orë policore gjatë natës kundër të rinjve në përpjekje për të luftuar dhunën e lidhur me drogën.
Ministria e Drejtësisë e Francës vlerëson se numri i adoleshentëve të përfshirë në tregtinë e paligjshme është rritur më shumë se katërfish në tetë vitet e fundit.