Autoritetet shëndetësore kanë lëshuar një njoftim urgjent për tërheqjen nga tregu të një ilaçi të përdorur gjerësisht për tensionin e gjakut, pas zbulimit të një gabimi në dozimin gjatë prodhimit.
Agjencia Rregullatore e Barnave dhe Produkteve Shëndetësore (MHRA) paralajmëroi se disa kuti të etiketuara si Ramipril 10 mg mund të përmbajnë në fakt blisterë me dozë më të ulët, 5 mg.
Alarmi u ngrit pasi një pacient zbuloi gabimin në një paketë të mbyllur. Sipas autoriteteve, problemi duket se ka ndodhur gjatë procesit të paketimit në fabrikë, ku prodhohen të dyja dozat e ilaçit.
Pacientët këshillohen të kontrollojnë paketat e tyre për numrin e serisë GR174091, i cili është i shënuar në kutinë e jashtme. Ata duhet të verifikojnë nëse doza në blister përputhet me atë të deklaruar në kuti.
Nëse brenda një pakete 10 mg gjenden kapsula 5 mg, ilaçi duhet të kthehet në farmaci. Ndërsa paketat e sakta nuk kanë nevojë të kthehen.
Megjithëse bëhet fjalë për një gabim, ekspertët theksojnë se rreziku për pacientët është shumë i ulët. Ramiprili përdoret për trajtimin e tensionit të lartë të gjakut, dështimit të zemrës dhe sëmundjeve të veshkave, dhe të dyja dozat përdoren zakonisht në trajtim.
Kjo do të thotë se marrja e një doze më të ulët gabimisht nuk pritet të shkaktojë pasoja të menjëhershme apo serioze. Sipas MHRA, çdo efekt do të ishte gradual dhe jo i rrezikshëm për jetën.
Megjithatë, pacientët që ndihen keq pas marrjes së ilaçit duhet të kërkojnë këshillë mjekësore dhe të marrin me vete medikamentin.
Farmacistët dhe profesionistët shëndetësorë janë udhëzuar gjithashtu të ndalojnë shpërndarjen e serisë së prekur dhe të kthejnë çdo stok të mbetur.
Ramiprili i përket një grupi ilaçesh të njohura si inhibitorë ACE, të cilët ulin tensionin e gjakut duke relaksuar dhe zgjeruar enët e gjakut. Ai është ndër barnat më të përshkruara, me dhjetëra milionë receta çdo vit dhe konsiderohet një nga pesë ilaçet më të përdorura.
Ky rast vjen pas një incidenti të ngjashëm më herët gjatë këtij viti, kur disa paketa të Ramipril 5 mg u mbushën gabimisht me një ilaç tjetër për tensionin. Edhe atëherë, autoritetet deklaruan se rreziku ishte i ulët, megjithëse në disa raste mund të shfaqeshin marramendje për shkak të uljes së tepërt të tensionit. /GazetaExpress/