Basketbollisti i njohur kosovar Fisnik Rugova, është bërë pjesë e një iniciative të re për zhvillimin e gjeneratave të reja në kryeqytet.
Siç ka njoftuar vet ai përmes rrjeteve sociale, Rugova do të jetë trajner kryesor në “Shkollën e Basketbollit AA Prishtina”, ndërsa regjistrimet tashmë kanë filluar.
Hapja/aktiviteti i radhës do të mbahet të shtunën, më 9 maj 2026, nga ora 14:00, në Shkollën Fillore “Dardania”.
Kjo shkollë basketbolli është e dedikuar për fëmijët e moshës 6 deri në 12 vjeç (djem dhe vajza), ndërsa synon të ofrojë punë të strukturuar në zhvillimin individual dhe lojën ekipore, duke përfshirë edhe aspektet profesionale të disiplinës dhe argëtimit në sport.
Angazhimi i Rugovës në këtë projekt vjen krahas karrierës së tij aktive, pasi ai aktualisht është pjesë e KB Rahovecit, duke sjellë përvojën e nivelit të lartë edhe në punën me të rinjtë.
Aktualisht ai po luan me një mesatare prej 8.3 pikësh, 6.5 kërcimesh dhe 1.7 asistimesh tek Rahoveci dhe ishte ndër më meritorët pse klubi arriti të sigurojë mbijetesën në elitë./Telegrafi/