Programi i diskutueshëm i kontrollit të mendjes, MKUltra, i zhvilluar nga CIA gjatë Luftës së Ftohtë, është rikthyer në fokus pas njoftimit për një seancë dëgjimore në Kongresin amerikan.
Seanca, e caktuar për 13 maj, synon të hedhë dritë mbi këtë program sekret që u zhvillua nga viti 1953 deri në mesin e viteve ’60 dhe përfshinte eksperimente mbi njerëz, duke përdorur droga, hipnozë dhe teknika psikologjike për manipulim dhe marrje informacioni.
Anna Paulina Luna kishte kërkuar rifillimin e seancave dëgjimore në Kongres për këtë çështje, duke iu referuar një artikulli të publikuar në shkurt nga Daily Mail, ku raportohej se një dokument i sapozbuluar mbi eksperimentet e kontrollit të mendjes ishte vendosur një vit më parë në sallën e leximit të CIA-s.
Në foto paraqitet Dr. Frank Olson me bashkëshorten e tij Alice dhe fëmijët e tyre (nga e majta në të djathtë) Eric, Lisa dhe Nils.
Një nga rastet më të debatueshme lidhet me vdekjen e shkencëtarit Frank Olson, i cili u ekspozua në mënyrë të fshehtë ndaj LSD gjatë një eksperimenti dhe vdiq disa ditë më vonë pasi ra nga një hotel në Nju Jork. Ndërsa vdekja u klasifikua si vetëvrasje, familjarët dhe disa studiues dyshojnë se ai mund të jetë eliminuar për arsye sigurie.
Dokumentet tregojnë se MKUltra përfshinte mbi 140 projekte dhe eksperimente mbi kategori të ndryshme njerëzish, përfshirë të burgosur, pacientë me probleme mendore dhe qytetarë të zakonshëm, shpesh pa dijeninë e tyre.
CIA po testonte droga dhe teknika të tjera mbi qytetarë amerikanë gjatë viteve ’50 dhe ’60 për të zhvilluar metoda të reja marrjeje në pyetje, përfshirë kontrollin e mendjes. Ish-zëvendësdrejtori i CIA-s, Allen Dulles (në foto), urdhëroi agjencinë të zhvillonte substanca për manipulimin e mendjes.
Gangsteri James “Whitey” Bulger, ish-boss i krimit të organizuar, u përdor si subjekt testimi në vitin 1957 gjatë kohës që ishte i burgosur në burgun e Atlantës. Ai tregoi se ishte një nga tetë të dënuarit që përjetuan gjendje paniku dhe paranoje gjatë eksperimenteve të MKUltra.
Megjithëse një pjesë e madhe e dokumenteve u shkatërrua në vitin 1973, një hetim i Kongresit në vitin 1975 zbuloi ekzistencën e programit, duke shkaktuar reagim të fortë publik dhe duke çuar në krijimin e mekanizmave të mbikëqyrjes për agjencitë e inteligjencës.
Së fundmi, publikimi i mbi 1,200 faqeve dokumente të reja ka shtuar interesin dhe shqetësimet rreth shkallës dhe etikës së këtyre eksperimenteve.
Zyrtarët amerikanë kanë deklaruar se programi u ndërpre për shkak të mungesës së rezultateve dhe shqetësimeve etike, ndërsa hetimet e reja synojnë të zbardhin plotësisht këtë kapitull të errët të historisë. /GazetaExpress/
The post Programi sekret MKUltra I CIA-së rikthehet në vëmendje pas një vdekjeje misterioze të një shkencëtari appeared first on Gazeta Express.