Gjatë javëve të fundit, kanë dalë disa lajme lidhur me përçarje dhe tensione në dhomën e zhveshjes së Real Madridit.
Álvaro Arbeloa ka qenë në qendër të tyre, me disa lojtarë që thuhet se nuk flasin më me njëri-tjetrin, ndërsa të enjten u shfaq një tjetër polemikë mes tij dhe Kylian Mbappés.
Pas fitores ndaj Real Oviedos në “Bernabéu”, Mbappé i bëri publike pakënaqësitë që ka me Arbeloan.
Trajneri i Real Madridit reagoi në atë moment, dhe e preku sërish temën gjatë konferencës për shtyp para ndeshjes së së dielës në transfertë ndaj Sevillas, sipas “Diario AS”, përcjell “Gazeta Express”.
“E pashë vetëm tani. I thashë të qetësohej, se po merresha unë me këtë çështje. E kuptoj që këto gjëra mund të duken si lajm. Gjithçka që tha Kylian në zonën miks është diçka që unë tashmë e kisha diskutuar me të më parë. I jap shumë më tepër natyrshmëri sepse, siç u them gjithmonë lojtarëve të mi, unë kam qenë në atë situatë. E kuptoj se si ndihen lojtarët në të gjitha situatat. E di si është të luash çdo ndeshje, e di si është të luash më pak, e di si është të mos luash… E kuptoj shumë mirë se si ndihen lojtarët kur nuk luajnë, tha ai.
“E di që Kylian nuk ishte i lumtur ditën tjetër dhe më pëlqen kjo. Nuk do ta kuptoja që Kylian Mbappé të mos dëshironte të luante për ekipin e tij edhe në një situatë të tillë. Për mua është diçka shumë më normale sesa është paraqitur. Mendoj se me situatën që kishte, gjëja më e mirë ishte që ai të luante pak në pjesën e dytë, në mënyrë që të mund të luante të dielën. Ndoshta pa ndeshjen e nesërme situata do të ishte ndryshe. Por asgjë më shumë. Unë i jap shumë normalitet asaj që ka ndodhur këto ditë. Marrëdhënia ime me Mbappé mbetet e njëjtë”, shtoi Arbeloa.
Arbeloa pranoi se nuk ka asnjë problem me faktin që Mbappé i bën publike pakënaqësitë e tij, megjithëse do të preferonte që çështja të mbetej pas dyerve të mbyllura.
“Sa herë që flas me lojtarët, nuk kam frikë që ata mund të komentojnë apo të shprehin ndonjë nga bisedat që kemi pasur. Kur flas privatisht, më pëlqen të mbetet private, por nuk kam problem që ata të bëjnë publike një bisedë që kanë pasur me mua. Fola me të para ndeshjes dhe atë që i shpjegova juve, ia shpjegova edhe atij, dhe nuk ka ndonjë problem të madh”, e mbylli trajneri spanjoll./GazetaExpress/
The post Arbeloa flet për situatën me Mbappe: Më pëlqen që ai nuk ishte i lumtur appeared first on Gazeta Express.